كانيلونى

موضوع: كانيلونى الأحد نوفمبر 14, 2010 9:41 am

الكانيلونى

المقادير:

* 1 كوب حليب
* 1 كوب دقيق
* 3 بيض
هذه المقادير تكفى عمل 11 قرص, و يمكن مضاعفة الكمية حسب الرغبة

الطريقة:

نخلط جميع المقادير سوا و نقلب كويس جدا لحد ما يمتزجوا كويس بالشكل ده

و بعدين نصفى الخليط من خلال مصفاة رفيعة عشان نشيل أى كلاكيع

و بعدها هيكون الخليط سائل و سميك حاجة بسيطة

بعد كده نجيب طاسة تيفال صغيرة و نحط فيها نقطتين زيت و نسخنها ع النار و بعدين ناخد مقدار كبشة من الخليط بتاعنا و نحطها بشويش فى نص الطاسة

نحرك الطاسة لحد ما الخليط يغطى كل مساحة الطاسة

و نتأكد ان الخليط اتفرد كويس,عشان نحصل على قرص كامل,كأننا بنعمل بيض أومليت

نسيبه على نار متوسطة لحد ما يبدأ يستوى, و ده هنعرفه لما نلاقى الحروف نشفت و ابتدت تعلا عن الطاسة و كمان لما نحرك الطاسة,القرص يتحرك معانا

نقلب القرص على الجهة التانية و نسيبه ثوانى يادوب ياخد لون و نطلعه على صينية أو طبق.
نكرر لحد ما تنتهى كل الكمية و بين كل قرص و التانى,نحط نقطتين زيت فى الطاسة

بعد كده نعمل صوص بشاميل عادى خالص,لكل 1 ملعقة دقيق نحط 1 ملعقة زبدة
و نقلب كويس لحد ما يمتزجوا مع بعض كويس و كل الدقيق يدوب فى الزبدة

و بعدين نضيف 1 كوب حليب و نقلب كويس جدا عشان كله يمتزج كويس

نحط ملح و فلفل حسب الرغبة .بعد ما نطفى النار,نضيف 1 بيضة و نقلب كويس
طبعا نضاعف كمية البشاميل حسب ما احنا عايزين
نجهز الحشوة.............
العادى اننا نستعمل لحمة مفرومة متعصجة,لكن أنا بأحب أعمل حشوة مخصوص .....
بأضيف للحمة المفرومة طماطم و فلفل رومى و بصل و مشروم و زيتون أخضر و أسود و جبن رومى مبشور.......الخلطة دى بيبقى طعمها حلو أوى مع بعض

ناخد قرص من اللى عملناهم و نحط فيه شوية حشوة
و نلف القرص على الحشوة

و نرص وحدات الكانيلونى فى طبق فرن بايركس

و لما نخلص كل الكمية,نحط على الوش البشاميل اللى عملناه

و ممكن نرش ع الوش جبنة رومى مبشورة أو موزاريللا
و بعدين محطه فى الفرن لحد ما الوش يتحمر

و بالهنا والشفا ويارب لما تجربوها تعجبكم
واتمنى اسمع اراء كل الى جربوا الطريقه

------------------------

---

موضوع: رد: كانيلونى الأربعاء مارس 23, 2011 1:52 pm